State chhunga ramdang mi lo lut rute dapchhuaka thawn kir tura dan tur sawiho

0
381
views

Sorkar laipuiin kumin August ni 8-a State hrang hrang Chief Secretary leh Union Territory Chief Secretary te hnena lehkha thawna an State chhunga ramdang mi lo lut rute dapchhuaka thawn kir tura a hriattirna chu bawhzuiin vawiin khan Home Secretary, Pu Lalrinliana Fanai hovin hmalak dan tur District hrang hrang Bawrhsap leh SP ten an sawiho. He Meeting Chief Secretary Conference Hall-a neihah hian ramdang mi lo lut ru an awm leh awm loh te, India thenawm ram thenkhata mi thenkhatin buaina leh harsatna an tawh avanga ram danga tlan chhia an awm nia hriat vangte-in ram himna atan inventhat a tul thu tarlan a ni. He meeting-ah hian sorkar laipuia Ministry of Home Affairs-in phalna nei lova Bangladesh mite thawn haw na tura inkaihhruaina dan kum 2009 November ni 23-a a lo siam tawh zul zuiin Special Task Force Committee din rem tih a ni a, Bangladesh ramri depa awm District hrang hrang 3, Mamit, Lunglei leh Lawngtlaiah te chuan Bawrhsap kaihhruaiin District Task Force lo din tawh chu chak zawka hnathawk thei tura siamthat remtih a ni. District Level Task Force bakah hian Civil Sub-Division Level-ah te Committee hran din remtih a ni a, he Committee-ah hian SDO, BDO, Police, BSF leh khaw tina VCP te, tlawmngai pawl hrang hrangte an tel dawn a ni. Heng Committee-te hi thla 3 danah an thukhawm thin ang a, State sawrkarah an hmalak dan an hriattir thin dawn a ni. Bangladesh ramri vengtu BSF te pawh phalna nei lova ramri kante dapchhuah kawngah tun aia nasa zawka tan la tura hriattir an ni. He meeting-ah hian Lunglei Bawrhsap aiawh leh SP, Mamit Bawrhsap, Pi Lalbiaksangi leh SP leh Lawngtlai Bawrhsap, Dr. Arun T. leh SP te, Central YMA aiawhtu Pu Fabian Lalfakawma te leh Central Young Chakma Association aiawhte an tel a ni.