Study Centre Coordinator leh Resource Person-te tana training ni 2 awh tur Education Minister-in hawng

0
571
views

Diploma in Elementary Education-a thawktu, Study Centre Coordinator leh Resource Person-te tana training ni 2 awh tur chu SCERT Auditorium-ah Education Minister Pu H Rohluna’n vawiin khan a hawng. Pu H Rohluna chuan, Sorkar laipui leh Department-in zirna kalphung tha zawk siam tura hma a lakna kawngah zirtirtute chu a pawimawh hmasa ber an nih thu a sawi a, naupang te zirna tha leh changkang pek chu zirtirtu te thiamna leh thahnemngaihnaah a innghat thui hle tih sawiin training a tel te chu an naupang ten hmasawn phah nan an hman ngei a beisei tih a sawi bawk. Right to Education Act 2009 siamthat a nih hnuah Govt. Aided leh Unaided-Private school-a zirtirtu training nei lo te chu nakum April ni 1 hnu lamah ban vek tura tih a nih vangin Sorkar laipui ruahmanna siam angin Diploma in Elementary Education course hi buatsaih a ni a, he course training tur hian mi 7316 an inziaklut tawh a, Elementary School a thawk B.Ed Degree nei te pawh an training vek a ngai a ni.