Supreme Court-in PM Narendra Modi nun behchhana film siam tlangzarhna hun ti khawtlai rih tura ngenna chu hnawlin Election Commission ngaihtuah tur a ni a ti a, Election Commission hian inthlan zawhfel hma chu chhuah lo turin thupek a siam nghal.

0
290
views

Chief Justice Ranjan Gogoi-a kaihhruai Supreme Court Bench chuan “PM Narendra Modi” film chhuah hun tura ruat, tun thla ni 11 chu ti khawtlai rih tura ngenna a hnawl hnuah, Central Board of Film Certification chuan mi tin en theih tura phalna Unrestricted certificate a pe a, hetihlai hian Election Commission chuan political party tin leh candidate te zingah media hmanga hlawkna tel bik an awm a rem loh thu sawiin, he film hi inthlan zawhfel hma chuan chhuah lo turin thupek a siam zui a ni.

Eptu pawlte’n NaMo TV in model code of conduct a bawhchhia tia Election Commission hnena an zualko chungchangah pawh kar hmasa khan Information and Broadcasting Ministry te chu NaMO TV chungchang report pe tura tih an ni a, Ministry chuan NaMo TV chu DTH service provider te pekchhuah mipui hmaa inphochhuahna a nih thu leh chhuah turin sorkar phalna a ngaih loh thu a sawi a ni. Election Commission chuan NaMo TV-a thil chhuah te chu district leh state a media endik tura ruat committee te phalna nena chhuah a nih leh nih loh endik turin Delhi Chief Electoral Officer a hrilh a ni.