Syria-ah sorkar-in hel pawlte hmunah bomb thlak, civil mi tam tak thi

0
517
views

Damascus bul, Eastern Ghouta-a sorkar laka hel pawlte inkulhna hmun chu Syria Sorkarin bomb hmanga beiin, civil mi tam tak an thi. Human Rights chungchanga Syria ram viltute sawi danin, Thawhtanni-a Syria sorkarin indo thlawhna leh rocket hmanga a beihna ah hian civil mi, naupang 20 tiamin, mi 98 aia tlem lo an thi a, mi 470 zet an hliam bawk. UN thuneitute chuan thil awmdan a that loh chhoh zel avangin inbeihna hi titawp lailawk turin an ngen a ni. Eastern Ghouta hi kum 2013 atang khan sorkar laka hel pawlte hian an thunun tawh a, helai hmunah hian mi 400,000 vel lai an cheng a. Damascus khawpui bul hnaia sorkar laka hel pawlten an awp mek awm chhun a ni tawh a, sipaite hian chhuh let tuma tun thla tir lama an beihnaah mi 100 telin an lo thih phah tawh bawk a ni. Sipaite hi helai hmun ke-a luh chhuah tum hian an inbuatsaih mek nia hriat a ni a, Pathianni atanga sipaiten an beihna ah hian civil mi te awmna mai bakah chhang leh eitur dang siamna hmun leh eitur chhekkhawlna hmun ni thei awm apiangte an tum bik a. Tanpui hna thawktu pawlte chuan sipaite hian motor kawngpuite pawh an tih chhiat nasat avangin tanpui hna thawktute tan pawh tlawhpawh hleih theih an ni lo a, damdawiin te pawh beih zingah hian a tel avangin mitthi hi an pung chho zel a ni.