Syria Eastern Ghouta-ah civil mi te tanpuina phurtu motor lut tan

0
591
views

Syria Sorkarin helte laka beihpui a thlak avanga civil mi tam tak thihna leh tawrhna thlen mekna hmun Eastern Ghouta ah mamawh zual tanpuina phurtu motor liante an lut tan ta. February thla laihawl atang tawha inbeihna hmunah hian tuna truck 46 lut turte hi tanpuina bungraw thawn luh hmasak ber a ni dawn a. UN in inkahhai puang tura a ngenna leh Russia in tanpui ngaite tanpuina hun atana ni tin inbeih chawlh lailawk nei tura a ngenna te pawh a lo hlawh chham tawh a, he inbeihna hi mi 719 zetin an thih phah tawh a, an zinga tam tak chu naupang an ni. Nizan lamah pawh khan Syria Sorkarin thlawhna hmanga a beihnaah civil mi 14 an thih belh leh niin activist pakhat chuan a sawi a, Eastern Ghouta ah hian mi 5640 zetin hliam an tuar tawh a ni. BBC Jeremy Bowen sawi danin, tuna eitur leh tanpuina dang phurtu motor lian te hian helai hmuna tangkhang mek mi 27,500 te hnen tha taka a thleng thei anih chuan bul tanna lawmawm tak a ni dawn a ni. World Health Organisation official pakhatin Reuters a hrilh danin Syria Sorkar chuan tanpuina bungaw phurhluh tura ruahman zinga zaa 70 zet chu Syria Sorkarin phurh luh phal lovin a hlang thla a, heng bungraw hlan thlakte hi inzaina hmanrua leh a kaihhnawihte a ni tlangpui a, hetianga Syria sorkar thil tih dan hi hel pawl zinga mi hliam tuarten damdawia enkawlna an dawn lohna tur nia ngaih a ni.