Syria Ghouta-ah inbeihna la tawp lo, mi 805 thi tawh

0
377
views

Syria khawpui, Damascus dâi-a tharum thawhna a nasa chho zel a, vawiin lamah pawh indo thlawhna te’n hmun hrang hrang an bei nasa hle. Syrian Observatory chuan February ni 18 atanga Syria sorkarin beihpui a thlak atang khan civil mi 805 an thi tawh niin vawiin khan a sawi bawk a, heng zingah hian naupang 178 an tel niin a sawi. Puan tawh angin Damascus depa hel pawlte inkulhna pui ber, Ghouta-ah hian UNSC chuan inkahhai puan a phut chungin, Russia sorkarin a thlawp, Bashar al-Assad-a kaihhruai sorkar chuan hel pawlte hi an la bei chhunzawm zel a, Ghouta hmun za-a thena hmun 40 vel chu sipaite’n an thuhnuaiah an dah tawh a ni. Ghouta dinhmun hi a khirh hle a, kum 2013 atang tawh khan an ram President, Bashar al-Assad-a lamtang sipaite chuan an lo hual tawh thin a, UN Security Council-in puih han tum ve thin bawk mahse, Council Member zing ami, Russia leh China-te chuan an thuneihna hmangin, UNSC-in Syria hrekna a tumna hi an dang zel a ni. Russia chuan Ghouta-a hel pawl-te hi an awmna hmun chhuahsana sorkar sipaite’n an lak an remtih chuan, him taka an chhuahna tur ngaihtuah pui a inpeih reng thu a sawi ve bawk a, Russian Defence Ministry chuan hel pawl-te hian an chhungte leh an ralthuam-te nen, Ghouta an chhuahsan phalsak an nih tur thu leh, umzui an nih loh tur thu kar hmasa lam khan a lo sawi tawh a, Assad pawhin Ghouta-a an beihpui thlak lai chu tihtawp an tum loh thu leh an la chhunzawm zel tur thu chawlhni kalta khan a sawi ve bawk a ni.