Taiwan lirnghing-ah mi 2 thi

0
502
views

Nizan dar 9:50-a Magnitute 6.4-a na lirnghingin Taiwan a sawi avangin mi 2 aia tlem lo an thi a, midang 200 chuang an hliam bawk. Lirnghingin a sawi nat lai ber hi khawchhak lam tuipui kam hnaih a ni a, Hualien khawpuiah chuan chhanchhuah hna thawktuten hotel leh in chim kar a\angin mi 150 chuang an chhanchhuak a, building lian pui puite pawh lirnghing avang hian tluk mai hlauhawmin a awn a ni. Lirnghing sawi chhiat building zingah hian damdawiin te pawh a tel a, chhawng 10-a sawng Marshal Hotel building chhawng hnuai ber leh a dawttu chu lirnghing hian a sawi chhe vek a ni. Hotel-a thawktu zinga pakhat chu chhan chhuah a ni a, a bulhnaia awm ten hotel chhungah hian eng an hmuh avangin midang pawh an la tang nia hriat a ni. In 40,000 zet chuan tunah tui an hmu thei lo a, highway leh lei \hahnem tak khar a ni a, mipuite chu an chenna in chhia rauhsan tura thurawn pek an ni a, mi 800 chuang zetin vantlang in leh hmun ruak remchang an bel a ni. Office leh School te pawh khar vek a ni a, chhanchhuah hna thawk tur hian sipaite pawh Hualien khawpuiah hian koh luh an ni. Hualien ah hian mihring 100,000 vel an cheng a, khualzinte tlawh nasat \hin tak khawpui a ni. Km 160 zeta hla, Taiwan khawpui Taipei-a chengte pawhin lirnghing hi an hre phak a ni. A siper, aftershock-in a la chhunzawm deuh reng avangin chhanchhuah hna thawh chak theih a ni rih lo a, Taiwan hi tectonic plate pahnih in sutna zawna awm anih avangin lirnghing-in a sawi zing hle a, kum hnih kalta ah khan magnitude 6.4 -a na lirnghingin a lo sawi tawh a, mi 117 zetin an lo thih phah tawh a ni.