Taj Mahal chu India ram chanchina thil mualphothlak niin UP BJP MLA-in sawi

0
574
views

Khawvela thlan in hmingthang, Agra-a Taj Mahal chu a awmna state, UP-a BJP MLA pakhat, Sangeet Som-a’n ram phatsantute kutchhuak, India ram chanchina thil mualphothlak nia a sawi avang leh, Uttar Pradesh Tourism chhuah, sorkar lehkhabu-ah telh a nih loh avangin titi a tam hle a, niminah khan he MLA hian, he Taj Mahal satu hian a pa chu a hreng hlum a, Hindu ho chu suat mang vek a duh a, hei hi History-ah a lang vek a, Taj Mahal sak dan chanchin hi a zahthakin, a mualphothlak hle niin Meerut-a vantlang inkhawmah a sawi a ni. BJP hruaitu dang, Nalin Kohli erawh chuan hei hi a pawm loh thu sawiin, Taj Mahal hi India ram chanchina thil pawimawh, India ram tihmingthangtu a ni zawk a, tun hmaa thil thleng tawh chu siam \hat theih pawh a ni tawh lo tih a sawi ve thung a ni. Sangeet Som hi kum 2013-a Muzaffarnagar buaina, mi 60-in an thih phah tipunluntu leh mite fuihpawrhtu pakhata ngaih a ni a, boruak tisosang zawnga thusawi ching tak a ni. Mughal lal, Shah jahan-a sak, Taj Mahal hi kum tin, khawvel hmun hrang hrang a\angin mi sang tam takin an tlawh ziah a, heti chung hian he thlan in ropui tak, kum zabi 17-a sailungvara sak chungchang hi UP-a BJP sorkar thla 6 tlinna puala state sorkarin lehkhabu te a chhuahah a tel ta lo a, state CM, Yogi Adityanath pawhin Taj Mahal hian India mite nunphung leh khawsak dan pho lanna a ni lo niin June thla khan a lo sawi tawh a ni.

Hyderabad MP, Asaduddin Owaisi, Majlis-e-Ittehadul Muslimeen party mi chuan Sangeet Som-a thusawi hi chhangin, hetianga BJP-in Muslim-te kutchhuakte a en dan a tidanglam dawn a nih chuan, nakkumah Independence Day-ah PPM-in Delhi-a Red Fort-ah hnam puanzar a pawt pharh leh dawn em tih a zawt a, Red Fort pawh hi Sangeet Som-a’n ram phatsantute a tih, Muslim lalte kutchhuak tho a ni tih a sawi.