Tamil Nadu CM tum nga lai lo ni tawh, DMK party president, Muthuvel Karunanidhi chu nimin tlai lam dar 6:10 khan Kauvery Hospital-ah a thi a, kum 94 mi a ni.

0
420
views

Karunanidhi hi ni sarih chhung sun a ni dawn tih Tamil Nadu sorkar chuan a sawi a, state pumah vawiin khan chawlh a puang nghal a ni. Puan tawh angin Karunanidhi hian zun kawng lam natna a neih bakah a upat tawh vangin a hriselna a \ha vak lo a, thla hmasa ni 28 a\ang khan damlo na zual enkawlna ICU-ah dah luh a ni a, thawh\anni lam a\ang khan a dinhmun a chhe zual leh niin damdawiin thuneitute chuan an sawi a ni.

Karuranidhi hi June ni 3, 1924 khan a piang a, politics-a a luh hma chuan film lamah thawkin, lemchan thu ziaktu a ni \hin a, thawnthu leh lemchan \hahnem tak a ziak hman a, politics-a khelh chhungin inthlanah chak loh a nei ngai lo a, kum 20 chhung state CM a ni hman a ni.

Karuranidhi hian nupui pathum a nei hman a, a nupui hmasa ber, Padmavathi nena an fapa, MK Muthu chu Tamil lemchan khawvelah hriat a hlawh hle a, a nupui pahnihna, Dayalu Ammal nena an fa pali zing ami MK Stalin leh MK Alagiri-te chu Tamil Nadu politics khawvela amah aiawh tura ngaih an ni bawk a, Stalin hi DMK party President a ni mek bawk a, a nupui pathumna Rajathi Ammal nen fanu pakhat, Kanimozhi an nei bawk a, Kanimozhi hi lemchan khawvela a pa hnungzuitu langsar tak a ni bawk a ni.

Karunanidhi-a phumna hmun chungchangah hian DMK leh state sorkar inkarah ngaihdan a inang lo a, Jayalalithaa thlan awmna, Marina Beach-a phum tum a nih vangin, rorel lai party AIADMK chuan an dodal a, zanlaia Madras High Court-in DMK ngenna a ngaihtuah hnuah, DMK dilna hi a phalsak ta a ni. DMK hruaitu hlui hian sun-tu a ngah hle a, a kuang an dah lailawkna Rajaji Hall tualah phei chuan mipui an tam em vangin police te ngawrh taka duty tir an ni.

Karunanidhi thih vang hian parliament rorel inkhawm pawh chawlhsan lailawk a ni a, ani hi Parliament Member ni lo zinga Parliament-in inkhawm chawlhsana a sun hmasak ber a ni a, a ruang chibai buk turin PM Narendra Modi bakah Congress hruaitu Rahul Gandhi, West Bengal CM Mamata Banerjee leh midang langsar tak takin Chennai an pan nghal a ni.