Telegu Desam Party hruaitu, YS Chowdary a’n an party MP dang, Ashok Gajapathi Raju nen BJP kaihhruai NDA sorkar-a Minister an nihna atangin an inhnukdawk tih vawiin khan a puang. TDP hruaitu lu leh Andhra Pradesh CM, Chandrababu Naidu chuan an party-in PM Narendra Modi-a Cabinet an chhuahsan chu loh theih loh vang niin a sawi a, NDA an thlawpna tihtawp erawh an la tum loh thu leh an party pahnih-te inkar an la sawi dun tur thu te a sawi bawk a ni. Puan tawh angin kum 2014-a Telangana state thar din a nih atang khan, TDP chuan Andhra Pradesh dinhmun chawisan lehna atan, Special Category dinhmuna an state hlankai an phut a, hei hi sorkar laipui lamin a tihhlawhtlin tak loh avang leh, sumfai tanpuina tur a pek mai loh avangin, an lungawilo hle a ni. TDP-in thu an chhuah hma lawk hian Union Finance Minister, Arun Jaitley chuan Andhra Pradesh state sorkarin Special Category-a awmte dawn ang chhawmdawlna a dawn tur thu a puang ve bawk a, politics thil vanga an sum dawn tur hi tih tam erawh thil theih a nih loh thu a sawi nghal bawk a ni.
Chanchin Thar TDP MP pahnihin Union Cabinet bansan
