Chief Minister, Pu Lal Thanhawla chuan thenawm ramte nena inlaichinna tha neih an duh chhan chu chanchin tha hrilhna remchang a nih dawn vang niin a sawi. He thu hi vawiina Congress Bhavan-a inkhawmah sawiin, thenawm ram pahnih Myanmar leh Bangladesh nena inlaichinna tha siam tura Sorkar laipui puihnaa hmalakna kalpui mekin a tum ber chu insumdawn tawnna neih ni bawk mah se, he hun remchang hi Pathianin amah ringtute chu khawvel zawng zawngah kala chanchin tha hril tura a tih tihhlawhtlinna remchang a nih pah dawn avangin an ngaipawimawh zual tih a sawi. Pu Lal Thanhawla chuan, nikuma Chapchar Kut hman dawna khuallian atana sawm Myanmar-a Chin State Chief Minister, Pu Salai Lianluai chu kumin March thlaa Chapchar Kut hman turah khuallian atan sawm leh a nih thu sawiin, hei hi Zofate insuihkhawmna a nih bakah ram pahnih-in inlaichinna tha an neih theihna tur niin a sawi. Chief Minister chuan Sorkar hotute leh hnathawktu tha tak takte zarah Mizoramin hma a sawn zel thu leh enfiah tlak Sorkar tha a ding mek niin a sawi a. Mithiamte chhut danin, ram sum leh pai dinhmun thanna chu ram pumah zaa 7.6 a nih laiin, Mizoram chu zaa 8 chung lam a ni a, nakkumah phei chuan zaa 10 aia sang ni tura chhut a ni, a ti. Bangalore-a Public Affairs Centre-in tehna hrang hrang hmanga State dinhmun a zirchiannaah Mizoram chu State te 12 zinga tha berah a puang a, mi thenkhatin engtiang pawhin Congress kaihhruai Sorkar chu sawisel thin mah se, heng tehna hrang hrang hian Mizoram Sorkar chu a tha thawkhat a ni tih a tichiang hle niin a sawi a ni. Pu Lalthanhawla chuan MNF chu Mizoram sawpchhetu-ah puhin, kum 20 chhung ramhnuai atangin ram an tichhia a, chumi hnuah mipui dunsakna zar zova sorkarna an siam hnuah ram an tichhe leh nia sawiin, chumi siamthat hna chu an thawk mek niin a sawi bawk.
He inkhawm hi MPCC General Secretary, Pu R. Liantluanga’n a kaihruai a, he inkhawmah hian MZP President hlui, Lalsangzuala Ngente leh Hnam pual zirlai pawl hruaitu thenkhat chu MPCC President, Pu Lal Thanhawla’n an Party-ah a lawm lut a ni. Thusawiin Lalsangzuala Ngente chuan Zohnahthlak inpumkhatna atan te, remna leh muanna a awm theih nan leh Mizorama hel pawl hrang hrang titawp tura MPCC President, Chief Minister Pu Lal Thanhawla hnathawh chu tha an tih vanga Congress party chu zawm an nih thu a sawi a. State Planning Board Vice Chairman, Pu H. Liansailova leh NLUP Implementing Board Vice Chairman, Pu P.L. Thanga’n thu an sawi bawk.
