Election Department hotute hnen a\anga Zonet thudawn danin, Mizoramin Lok Sabha seat 1 a neih chuh turin mi 6-in hming an pe lut a, chungte chu BJP Candidate, Pu Nirupam Chakma, MNF Candidate, Pu C. Lalrosanga. Prism Candidate, Pu TBC Lalvenchhunga, ZPM leh Congress-in an thlawp Independent Candidate Pu Lalnghinglova Hmar bakah Independent Candidate dang 2 – Pu Lalhriatrenga Chhangte leh Pi Lalthlamuani an ni.
Aizawl West I biala Bye Election neih turah hian chuh tuma hming pe lut mi 3 – MNF Candidate, Pu Zothantluanga, ZPM leh Congress-in an thlawp Independent Cadidate, Pu Lalbuanga Sailo leh Independent Candidate, Rev. Dr. Zaichhawna Hlawndo te an awm a, heng mite nomination paper hi vawiin vek khan endik niin hnawl an awm lo a ni.
Heng inthlan pahnih chuh tura Candidate-ten Nomination Paper an thehlutna, Affidavit a\anga a lan danin, Lok Sabha inthlan chuhtu zingah Independent Candidate, Pi Lalthlamuani chu upa berin kum 63 a ni a, a ni hi Aizawl Dawrpui venga cheng niin, Affidavit-ah hian a thiamna a tarlang lo a. MNF Camndidate, Pu C. Lalrosanga chu kum 62 a upa niin, thiamna lamah chuan BA (History) a ni a, Aizawl Tuikual Vengah an cheng mek a. BJP Candidate, Pu Nirupam Chakma chu 59-a upa niin, thiamna lamah LLB a ni a, Kalamanagar-ah an cheng mek a. Independent candidate, Pu Lalhriatrenga Chhangte chu kum 54 mi niin, Serchhip-a awm a ni a, thiamna lamah chuan B.Tech (Mining Engineer), LLB a ni a. ZPM leh Congress-in an thlawp Pu Lalnghinglova Hmar chu kum 41-a upa niin, candidate zinga naupang ber dawttu a ni a, thiamna lamah chuan MA (History) niin, Aizawl Venglaiah an cheng a. Candidate zinga naupang ber Prism Candidate, Pu TB Lalvenchhunga chu kum 36-a upa niin, thiamna lamah HSLC a ni a, Champhaiah an cheng mek a ni.
Aizawl West I biala Bye Election neih tura chuhtu mi 3 zingah MNF Candidate, Pu Zothantluanga upa berin kum 65 mi a ni a, thiamna lamah chuan MA niin, Aizawl Zotlang vengah an cheng mek a. ZPM leh Congress-in an thlawp Independent Candidate, Pu Lalbuanga Sailo chu kum 62-a upa niin, thiamna lamah BA a ni a, Aizawl Chawnpui vengah an cheng a, a naupang ber, Independent Candidate, Rev. Dr. Zaichhawna Hlawndo chu kum 55-a upa niin, thiamna lamah chuan Doctorate Degree a nei a, Chaltlang Lily vengah an cheng mek a ni.
Heng inthlan pahnih chuh tura hming pelutte tan hian naktip, ningani thleng inhnuhdawh theihna hun hawn a ni ang a, April ni 11-ah vote thlak tur niin, vote tlate chu May ni 23-ah chhiar a ni ang.
