Thla thar ni 8-a Assembly inthlanpui hmachhawn tur Delhi-ah BJP leh Congress party mala sorkarna siam theih an inrin thu an sawi ve ve.

0
323
views

BJP hruaitu Union Minister Prakash Javadekar chuan Delhi Assembly inthlanna chu thu tiam satlianh, a tak ram thleng lo leh hmasawnna hna thawk tak takte inbeihna tur a ni dawn a ni a ti a, Chief Minister Arvind Kejriwal-a’n Delhi mipuite a tih beidawn avangin a hun chu a tawp tawh dawn a ni a ti a, mipuiten BJP an awn vek avangin BJP chuan hnehna a chang ngei dawn a ni a ti. BJP hi kum 2015 Assembly inthlanah khan an che chhe hle a, seat 3 chiah an lak laiin AAP chuan seat 67 a la a. Hetihlai hian nikum Lok Sabha inthlanpuiah khan Delhi-a Lok Sabha seat awm zawng zawng pasarih chu BJP hian a hui vek thung.

Hetihlai hian Congress party pawhin Delhi Assembly inthlanpui neih turah hian party mala sorkarna siam theih an inrin thu an sawi bawk a, Delhi Congress president Subhash Chopra chuan party mala sorkarna siam an inrin thu a sawi a, campaign committee chairman Kirti Azad chuan AAP leh BJP lakah mipuite an beidawng niin a sawi.

Azad hian Sheila Dikshit-i hunlaia Congress hnathawh dan leh AAP sorkar hnathawh dan chu bukin, campaign auhlaah an hmang dawn tih a sawi a, Zirna In leh Damdawi In dinhmun te, dan phal loha chenna In sak chungchang te chu AAP leh BJP te an beihna tur a ni dawn tih a sawi.

Congress hi Delhi-ah a che \ha lo hle a, kum 2014 leh 2019 Lok Sabha inthlanah Delhi a\anga thlantlin pakhatmah an nei tawh lo a, 2015 Assembly inthlanah pawh khan an artelukawn a ni.