Thuruk pawimawh kawl rua puh vangin CIA officer hlui man

0
537
views

Thuruk pawimawh dan kalha kawl rua puh anih avangin CIA officer hlui pakhat chu US ah man a ni.
US-a piang, US khua leh tui, Jerry Chun Shing Lee hi New York JFK airport ah Thawhtanni khan man a ni tih US justice department chuan a puang a. CIA ah hian kum 1994 atanga 2007 thleng khan thawkin, hemi hnu hian Hong Kong lamah a cheng zui a ni.
He thubuai hi FBI ten kum 2012 atanga an chhui tawh, China-a CIA te hnathawhna kawnga harsatna thleng nen inzawma ngaih a ni a. Kum 2 kalta chhung khan US Inteligence te thu hrilhrutu mi 20 vel zet chu tih hlum emaw, Jail tantir emaw an ni a, hei hi tunhnaia US Inteligence lama a chet chhiatna lian ber pakhata ngaih a ni.
Lee hian kum 2007 khan CIA hi a bansan a, amah hretute chuan a hnathawhna kawngah lungawi lohna a neih avanga bang niin an sawi tih New York Times chuan a tarlang a. Lee hi Hong Kong ah awm zuiin, America ah hian kum 2012 ah chauh khan a let leh a, khami tum khan FBI mi leh sate chuan Hawaii leh Virginia-a a thlenna hotel te dapin, thuruk inziahna lehkhabu pahnih an hmu chhuak a, Lee hian kum 2013 khan US chhuahsan lehin tuna US a tlawh leh tum hian man a ni ta a ni.
US justice department thuchhuah tarlan dan chuan kum 53 mi, Lee hi ram venhimna kawnga thuruk pawimawh kawl ruk thubuai siamsak a ni a, thiam loh chantir anih chuan kum 10 thleng lung in tan tir theih a ni ang. Zhen Cheng Li tia hriat ni bawk Lee hian Case Officer atangin CIA hi a zawm a, thuruk pawimawh tak tak khawih phak anih bakah a ruka inremnaah te pawh hming ziaktu zingah a tel phak a ni. He thilah hian Lee hian vantlang hriatah engmah sawi a la nei rih lo a ni.