India leh Bangladesh inrina hrul khaw hrang hranga cheng, Chakmate chu YCA District Committee, Lunglei hruaituten kar hmasa chhung khan an dinhmun zirchianga an tlawh hnu-ah, an thil hmuhte ziaka an buatsaih chu nimin khan Tlabung SDO (C) Pu Lalsanglura leh Khawthlangtuipui Group YMA hruaitute kutah an hlan a ni.
YCA District Committee hruaitute chuan, Harina Valley, New Baluksury tia hriat bawka khawsa chhungkaw thenkhat chuan, buhfai chhum tur an nei tawh lo niin an sawi a, chaw atan bahra an ring tih ziaka report an buatsaihah hian an tarlang a, Supply department sem buhfai an kham loh thu leh dawr atanga leina tur pawisa an tlakchham tawh thu te, hmun hla zawka chakkhai lama kal chu mipui kharkhipna thupek dinglai vanga a theih loh thu te, mi nawlpuiin harsatna an tawh mek thu te, an tarlang bawk.
YCA District Committee report thehluha tarlan danin, ramri hnaiah chengte hian ramri kana mihring veivah an khap bakah, sumdawnna bungrua leh thlai lam thlengin lakluh leh thawn chhuah an khap a ni.
