Vawiina Hnam Run inkhawm a hmanpuinaah thu sawiin Pu TJ Lalnuntluanga chuan, an party-in Zofate inpumkhatna chu a ngaihpawimawh a nih angin hemi kawnga hmalakna pakhat atan Zofate awmnaa Bus service tir hi an tum tih a sawi a, Jampui leh Churachandpur bakah Myanmar lamah pawh service tir tum a nih thu sawiin hemi atan hian Sorkar laipui leh Myanmar sorkar indawr a ngaih avangin bawhzui mek a ni a ti a, Sorkar laipuia External Affairs Minister Sushma Swaraj pawh a sawipui tawh tih a sawi.
Pu TJ Lalnuntluanga chuan, Inland Water Transport lam buaipui a nih thu leh Akyab leh Bangladesh lam thlenga hmalak mek a nih thu te, hei hi a hlawhtlin chuan Lawng hmangin Kolkatta dawr theih a nih tur thu a sawi a, ho te te a Vairengte leh Bairabi vela vaiho nena innawk buai avanga harsatna thleng thin chu a bo thei dawn a, khawchhak leh chhim lam kawtchhuah chawibawl chu an hmachhawp a nih thu a sawi a. Immigration check post leh Integrated check post pawh felfai taka kalpui turin External Affairs Ministry lamah thlen a ni a ti.
Pu TJ Lalnuntluanga chuan, online hmanga lirthei chhiah pek theih turin buaipui mek a nih thu a sawi a, High Security Registration plate pawh kar khat chhunga tifel zel tura ruahman a ni a ti a, 2 wheeler Taxi permit chu tun dinhmunah pek chhuah rih loh an rel tih a sawi.
Inkhawm hi an pawl National Core Committee Member Pu D.Thangliana’n a kaihruai a ni.
