Tripura Assembly inthlanpui nimina neihah tluang taka vote thlak zawhfel a ni. Boruak muanawm tak hnuaiah vote thlak hi zawhfel a ni tih State Chief Electoral Officer, Sriram Taranikanti chuan a sawi. Tripura Assembly inthlanah hian polling station 3,174 siam a ni a, polling station 100 velah chuan nizan dar 10 pelh hnu thleng pawh khan vote thlak tum an la intlar tam hle a ni. Taranikanti chuan Assembly inthlan-ah hian vote a tla tha hle tih a sawi a, vote nei mi 2,536,589 zingah za zela 78-in vote an thlak a, VVPAT chhia 191 leh EVM chhia 89 a awm avangin, hmun thenkhatah chuan vote thlak a khaihlak a, Karamchara bial bikah inthlan that a ngaih tur thu a sawi bawk. CPIM hruaitu pakhat, Bijan Dhar chuan chanchinbumite a kawmna-ah hmun thenkhatah an party mi 5 chu BJP leh IPFT mi leh sa ten kut an thlak vangin, damdawiinah hruai an ni a ti.
Chanchin Thar Tripura Assembly inthlanpui neihah tluang takin vote thlak
