Sorkar laipui, Mizoram sorkar leh Tripura sorkar aiawhte chuan Tripura Bru Relief Camp 6 zinga 5 tlawh tawhin March thla a Mizoram mite lak let huna haw duh tur hming an la khawm mek. Home Ministry a Adviser Pu Mahesh Kumar Singla, Mizoram sorkar a Additional Secretary Pu Lalbiakzama, Lunglei,Mamit leh Kolasib DC-te leh North Tripura District DC Pu Sharabindhu Choudhury ten Camp hrang hrangte hi nimin atanga tlawh tanin thlaleh a Mizoram mi dik tak,Mizorama laklet duhte hming an la khawma, let duhte hming hi chawpleh chilha an pek theih mai loh avangin Camp hrang hrangah an hming lo chhinchhiahtu tur an dah a ni. Mi pawimawh rualten nimina Bru Relief Camp hrang hrang an tlawhte chu Kaskau, Khakchangpara leh Hamsapara te a ni a, vawiin khan Asapara an tlawh hnuah Camp lian ber, Naisingpara an tlawh leh a ni. An Camp tlawhah te hian Home Ministry-a Adviser Pu Mahesh Kumar Singla, Lunglei, Mamit leh Kolasib Bawrhsap te leh North Tripura District Bawrhsap, Pu Sharabindhu Choudhury te bakah Lunglei SP, Pu Lalthafamkima ten thu an sawi a, sorkar laipui leh Mizoram sorkar ruahmanna siam anga anmahni laklet dan tur te, hamthatna leh chhawmdawlna an dawn theih tur te an hrilhfiah a, thusawitu thenkhat chuan tuna anmahni laklet tumna chu a hnuhnung ber a ni tawh mai thei tih pawh an hrilh a ni. Camp hrang hrang an tlawhnaah hian Mizoram Bru Displaced People Forum Branch hruaitute bakah MBDPF Hqrs. hruaitute zinga mi Vice President, Pu Laldawngliana leh Gen. Secretary, Pu Bruno Mesha te pawh ten an lo dawngsawng a, MBDPF Office-ah inkhawm neiin an thil hrilhfiah duhte an hrilhfiah thin a ni. Naisingpara-a inkhawmah MBDPF President, Pu A. Sawibunga chuan sorkar officer te thusawi theuh chu ziaka daha an hming pawh ziah hnan turin a ngen a, chutiang lehkha an kawl chuan zirchiangin hma an lak pui thei dawn niin a sawi a ni. Zawhna chhangin MBDPF hotute chuan Tripura Relief Camp-a Mizoram Bru awm te laklet dan tur ruahmanna siam chungchanga an lungawilohna Supreme Court-a an thlen chu Court-in a pawm avangin tun dinhmunah fimkhur taka thil tih a ngai niin an sawi a ni. MBDPF hotute chuan Camp hrang hrang tlawhtute hian Relief Camp 5 tlawh tawhin Hazacherra Camp erawh chu an la tlawh lo niin an sawi a ni.
