Tripura leh Nagaland-ah BJP leh a thawhpuiten sorkar siam thei dawn

Thenawm State pathum inthlanna-a vote tla te vawiin khan chhiar a ni a, Tripura leh Nagaland ah te BJP leh a thawhpuiten sorkar an siam thei dawn a, Meghalaya ah erawh sorkarna siam theihna khawp MLA nei an awm lo. BJP leh a thawhpui Indigenous Peoples Front of Tripura IPFT te chuan CPI-M kaihhruai Left Front chu lehthalin Tripura ah hnehna an chang a, Nagaland ah pawh BJP leh a thawhpui NDPP ten hnehna an chang bawk. Meghalaya ah chuan congress chu MLA ngah ber party la ni chhunzawm mahse, sorkar siam theihna khawp MLA an nei lo a, Chief Minister nilai Mukul Sangma chu a dinna bial pahnih Ampati leh Songsak ah te a tling ve ve a, Home Minister ni lai HDR Lyngdoh chuan a khingpui HSPDP candidate Samlin Malngiang chu Sohiong bialah vote 622 in a hneh lo thung. Tripura ah hian Congress hian bial 59 ah candidate an dah a, BJP in bial 47 chuhin National Peoples Party in bial 53 an chuh bawk. Inthlan result kimchang hriat theih la ni chiah lo mahse, vote chhiar kallai atanga hma an hruai dan enin, CPI-M kulhpui ni thin Tripura ah BJP leh IPFT tangdun te hneh takin an chak a, Seat 43 la tura ngaih an nih laiin CPI-M leh a thawhpuite chuan seat 16 chauh an la thei dawn a, CPI-M leh a thawhpuite hian 2013 ah khan seat 49 an la a, tun tumah erawh seat 33 zet an hloh ta a ni. Congress party pawh Tripura ah hian a che chhe hle a, 2013 inthlana MLA 10 nei khan tun tumah hian MLA pakhat pawh an nei zo dawn lo niin a lang. Nagaland ah pawh BJP leh NDPP tangdun ten hnehna an chang a, Nationalist Democratic Progressive Party NDPP hotupa Neiphiu Rio chu chuhtu dang awm lova thlinga puan a lo ni tawh a, BJP leh NDPP tangdun hian bial 31 aia tlem lo an la dawn tih a chiang tawh a, hetihlai hian NPF chuan seat 27 an chang a, Congress in seat lak an la nei lo bawk. Hetihlai hian Meghalaya ah chuan rorellai Congress party chu party mala seat la tam ber a ni dawn tih a chiang tawh a, sorkarna siam theihna khawp MLA erawh an nei dawn lo thung a, Congress hian seat 23 ah hnehna changin National Peoples Party NPP in seat 19 an la a, BJP in seat 2 an la bawk a, party tenau dang leh Independent candidate ten seat 15 vel an la dawn niin a lang a, Meghalaya ah hian Congress chuan sorkarna siam tuma hma a lak nghal laiin, congress ni lo sorkar siam tumin BJP hruaitu lamte pawhin tan an la nghal a ni. State pathum Assembly ah te hian seat 60 theuh a awm a, Tripura ah hian CPIM Candidate Ramendra Narayan Debbarma a thih avangin a dinna bial ah inthlan sawn hlat a ni a, Meghalaya ah pawh Williamnagar ah NCP Candidate Jonathone N Sangma chu Bomb tihpuah avanga a thih avangin inthlan sawn hlat a ni bawk a, Nagaland ah hian NDPP hotupa Neiphiu Rio chu a dinna bial Northern Angami-II bialah chuhtu dang awm lova tlinga puan a lo nih tawh bawk avangin state pathumah te hian bial 59 theuhah inthlanna neih a ni.