Tripura, Meghalaya leh Nagaland Assembly inthlan-a vote tla chhiar turin engkim peih fel

0
678
views

Tripura, Meghalaya leh Nagaland Assembly inthlan-a vote tla te naktuka chhiar turin engkim peihfel a ni tih Election lam thuneituten an sawi. February ni 18 khan Tripura Assembly inthlanah mipuiten vote an thlak a, tun kar thawhlehni khan Meghalaya leh Nagaland-ah te mipuiten vote an thlak leh bawk a, heng state pathuma vote tla te hi a rualin naktukah chhiar a ni ang. Heng state pathum-ah te hian Assembly Bial 60 theuh a awm a, chhan hrang hrang vangin, Bial 59-ah an inthlang theuh a, Tripura-ah chuan CPIM candidate a thih vangin, bial pakhatah inthlan thulh a ni a, Meghalaya-a Nationalist Congress Party candidate pakhat bomb puaka a thih vangin, inthlan thulh a ni bawk a, Nagaland-ah chuan Nationalist Democratic Progressive Party hruaitu, Neiphu Rio chu chutu dang an awm loh avangin tling-a puan a ni tawh bawk.

State pathum inthlan result hian ngaihven a hlawh hle a, vote tlak dan thlirtute chuan BJP an che tha hle niin an sawi a, Tripura-a kum 25 lai ro lo rel tawh, Left Front Party-te pawh an paihthlak theih hial an ring a ni. Meghalaya-ah chuan Congress-in kum 10 ro an lo rel tawh a, tun tum inthlanah hian candidate 59 an nei a, an party hruaitu leh CM ni lai, Mukul Sangma chuan bial pahnih a chuh a ni. Nagaland-ah chuan BJP-te hian tualchhung party, NDPP an thawhpui a, bial 20 an chuh laiin, NDPP-te hian bial 40 an chuh ve thung a, Naga People’s Front, NPF chuan Nagaland-ah hian kum 2003 atang khan ro an lo rel tawh a, kum 2008-a thla thum chhung President’s rule-a an state puan a nih lai tih loh kha chu, sorkarna an la siam char char a ni.