Trump-a hrisel, thluak fim takin thil ngaihtuah thei – White House Doctor

US President Donald Trump chuan hriselna lamah harsatna a tawk lo a, thluak fim takin thil a ngaihtuah thei tih White House doctor chuan a sawi.
Endik anih hnuah ngaihtuahna fim hman theihna leh a thluak hnathawh dan kawngah harsatna a neih ka hre lo tih White Hose Doctor Ronny Jackson hian nimin khan a sawi a. Kar kalta khan kum 71 mi Trump-a hi US President anih hnua a vawi khat nan darkar 3 chhung zet a hriselna dinhmun endik sak a ni.
Michael Wolff a lehkhabu ziah, Fire and Fury: Inside the Trump White House tih chhuah anih hnuah mi thenkhat, President rilru lam dinhmun rinhlelhna nei an awm a, White House Doctor Dr. Jackson chuan President hriselna dinhmun hi a vaiin a tha vek tih thuthar lakhawmtute hmaah a sawi a, vaihlo leh zu la ti chhin ngai lo anih avangin a hriselna a la tha hle a ni a ti.
Wolff hian a lehkhabu ziahah hian president chu a hna tlin lo leh rilru lama chak lohna neiah a puh a, White House-a thawkte pawhin naupang tih lungawi reng ngai angin an sawi niin a lehkhabu-ah a tarlang a. Trump-a chuan Wolff-a thuziak chu dawt hlang a ni tih a sawi a. Secretary of State Rex Tillerson pawhin hei hi thu dik lo a ni a ti bawk.