Tukin dar 5 vel khan Melthum daia Zampuimanga lungphun piah \awng\aina hmun kawng sirah Saza hliam hmuh a ni a, Environment, Forest and Climate Change Department hotuten hmalaknaa enkawl nghal a ni.

0
300
views

Nungcha humhalhtu pawl, Association for Environmental Preservation (ASEP) thuchhuah tarlan danin, Saza hi Mizoram State Animal a ni a, tukina Saza hliam hmuh a nih ve leh Forest Department hotute hriattir nghal niin, a hmunah Chhimphei YMA, ASEP, Aizawl Forest Division hotute leh Sahuan enkawltute an thleng nghal a. Sahuan Doctor, Dr. John Lalhnuna sawi danin, he saza hi thang awk tal chhuak niin a lang a. A awhna thang hrui tal chatin hun eng emaw chen chu hliam tuarin a lo awm tawh nia hriat a ni a, a awhna thirzai pawh a nakah a lo la inthlung a. A hliam hi a rei tawh tih a hnuhma a\angin a hriat theih a ni. He saza hi Aizawl Forest Division-in an la nghal a, Khatla Vety Hospital panpui nghal niin, Sahuan Doctor, Dr. John Lalhnuna chuan, a hliam hi a na viau mah se, a dam leh theih an beisei tih a sawi.

Hemi hnua thuchhuan in\awm an siamah Forest Department, ASEP leh Chhimphei Group YMA chuan, hetianga thang kama ramsa awk duh an la awm \hin chu an dem tak zet tih an sawi a. Tun hnuah chuan Chhimphei tlang dunga ramsate chu humhalh tlat a ni tih Zoram mipuiten hriat se an duh thu an sawi a ni.