Tun thla ni 25, Inrinni atanga Tripura Bru Relief Camp atanga Mizoram mite hruai haw dan tur chungchang vawiin khan inhrilhfiah a ni.

0
326
views

He meeting hi Tripura Damcherra BDO Office-ah neih a ni a, North Tripura District Magistrate Pu Raval Hamendra Kumar-an a kaihruai a, hetah hian Mizoram sorkar aiawha telte chu Joint Secretary, Pi Lalbiaksangi, Mamit Additional DC, Pu Jacob Lalawmpuia ten an hova, Kolasib leh Lunglei DC aiawhte pawh an tel a ni. He meeting-ah hian MBDPF hruaitute, MBDPCC hruaitute leh Bru Relief Camp hrang hranga an hruaitute pawh an tel a, Mizorama haw duh te hming tun hnaia chhinchhiah zinga mite chu laklet hun tura ruatah an haw duh dawn tih zawh an ni a, a duh leh duh lo te pawh an duhdan hming ziaka nemnghehna tur lehkha pek an ni. Hemi hnua ZONET zawhna chhangin MBDPF hruaitute chuan an mipuiten Mizorama let an hreh lo niin an sawi a, amaherawhchu, anmahni duhna hmunah awm tir an duh niin an sawi a, heng mite hi Kaskau Camp-a awm deuh vek an ni tih an sawi bawk a ni. Hetihlai hian tun hnaia pawl ding thar, Mizoram Bru Displaced People Coordination Committee, Pu T. Laldingliana kaihhruai chuan he meeting-ah hian tel ve mahse sawi ve tur an nei lo niin an sawi a, ZONET zawhna chhangin an pawl duhdan chu sorkar laipuiah leh Mizoram sorkarah Memorandum thehlutin tun hnai khan an hriattir tawh a, Damcherra BDO Office-a an thil sawiho chu Bru te Mizorama laklet lehna tura tun hmalama ruahmanna siam tawh mai a nih avangin an pawl din hnua an thilphut tarlan te a huam ve lova, chuvangin sawi tur an nei lo niin an sawi a, an thilphut te tihhlawhtlin a nih hma chuan Mizoramah let an tum dawn lo niin a sawi bawk.