Tunhnaia Home Minister leh Congress Vice President a\anga bang ta Pu R Lalzirliana leh MPC MLA Pu Lalthanliana ten vawiin khan MNF Party an zawm.

0
299
views

 

Pu R Lalzirliana chuan MNF a zawm chhan chu Congress in kum 10 chhunga a tihpuitlin theih loh District a tihpuitlin dawn vang leh hruaitu biak nuam hrawn ve a duh tawh vang niin a sawi.

District function loh chhan a Cabinet meetingah pawh pu lut lo nia an puhna chu chhangin Pu R Lalzirliana chuan, Cabinet a ngaihtuah tura pu lut thei tu chu GAD changtu Chief Minister a nih thu a sawi a, a bula sawi chu a tih theih tawk a nih thu sawiin, a ti theitu in a tih duh loh vangin a tan tih ngaihna a awm lo niin a sawi. Pu R Lalzirliana chuan, kumin kumtira Bairabi Zophai a MZP ten Zofate chawlhbuk sak an tum chungchanga Assam Police ten MZP te kut an thlak hnuah Congress Legislature Party leh an party Office Bearers te thukhawmin MZP te duhdana Zophai a Zofate chawlhbuk sak ngei an rel a, Chief Minister in a hming a ziah hnan vek hnuah hmalakna awm tak loh avangin MZP te lungawi lovin hnatlangpui an ko a, a hriatpui lohin Chief Minister in CrPC 144 a puan tir a ni a ti.

Pu R Lalzirliana chuan, NLUP chu tuna an sem bak Sorkar leh pawh nise a sem tur a awm tawh lo niin a sawi a, Congress party chu mirethei te VIP ti chunga an dinhum hre chiang loah puhin kawngpui chhia pawh an hmu thei tawh lo niin a sawi bawk.

Pu PC Lalthanliana pawhin thusawiin MPC party chhuah sana MNF a zawm ta chu a chhuahsan tak MPC party in pawi an la ti dawn chauh niin a sawi a, Politics chu Pathian telna tlakah a ngaih avangin MNF chu a zawm ta niin a sawi.

Politics-a milangsar pahnihte lawmluttu MNF President Pu Zoramthanga chuan Congress Party chu ramchhungah a chim zo \ep tawh niin a sawi.

Pu Zoramthanga chuan, Congress party chu an hotuten an chhuah san mek nia sawiin hei hi MNF hmalakna vang ni lovin Pathianin MNF Sorkar tir a tum tawh vang niin a sawi.

He inkhawma hunserh hmangtu Evangelist R Lallungmuana chuan Pathian thuhriltu a nih angin an sawmna hmun apiangah Pathian thu a sawi \hin tih a sawi a, he inkhawma hunserh a hmang chu party a tel ve a nih vanga hmang ni lovin rawngbawlhna a a ngaih vanga hmang a nih zawk thu a sawi.

Inkhawm hi an pawl Vice President Pu R Tlanghmingthanga’n a kaihruai a, Pu R Lalzirliana a bakah an party zawm thar mi engemawzat Pu Zoramthanga’n a lawmlut bawk.