Tunhnaia Village Council 44 leh Local Council 8-a MNF Sorkar thar piang chu MNF party in vawiin khan an lawm.

0
312
views

 

MNF Party Office, Mizo Hnam Run-a lawmna inkhawm, an party National Core Committee member Pu K.Vanlalauva kaihhruaia thusawitu MNF President Pu Zoramthanga chuan an party leh BJP an thawkho lo tih an sawi chiang tawh hle chungin, thawkho anga lantir tumin an elpui party ten mipui rilru thudik lo hmangin hruaipen an tum ngat ngat niin a sawi a, BJP nen engtik lai mahin an la thawkho lo nia sawiin, Parliament a Congress kaihhruai UPA duh lo ho zawng Party hrang hrangte chu NDA lamah an awm mai zawk niin a sawi a, hetah hian MNF, ZNP leh MPC te pawh an tel nia sawiin NDA-a an tel dan chu Mizorama Synod Moderator kaihhruaina hnuaia Mizoram Kohhran Hruaitu Committee inthlung khawm nen a tehkhin a ni. Pu Zoramthanga chuan NDA leh NEDA a an tel avangin BJP duhdan zawmin an thawhpui ta tihna a ni lo niin a sawi a, Assembly inthlan turah bial 40-a Candidate an dah vek chuan an thawhho loh zia a ti chiang niin a sawi.

Pu Zoramthanga chuan BJP nena thawkho chu Congress an ni zawk a, Chakma Autonomous District Council-ah Congress leh BJP in sorkar in\awm siamin an thawk ho a ni a ti a, MPCC President Pu Lal Thanhawla’n BJP an thlawpna an chhutchat tih sawi mahse tunthlengin CADC ah BJP leh Congress thawkdun sorkar a la ding reng a ni a ti a, MNF chu Pathian leh kan ram tan titu a nih avangin BJP Hinduva nen engtikah mah a kalkawp thei ngai dawn lo niin a sawi bawk. Pu Zoramthanga bakah hian Aizawl South II MNF Candidate Pu Denghmingthanga leh Aizawl East II Candidate Pu Robert Romawia Royte ten thu an sawi bawk.