Tun thla ni 10 atanga Jet Airways in Mizoram service an tihtawp hnuah Air india chauh Lengpui Airport ah a service a, Air India-ah ticket indaih lohna a nasat avang leh chuan man a san avangin mipuiten harsatna nasa tak an tawk zui a ni. He harsatna sutkian dan tur dapin Larsap Pu Kummanam Rajasekharan chuan Delhi-ah Union Aviation Minister leh Aviation thuneitu sang te chu nimin khan a kawm a. Sorkar thuchhuah tarlan danin he inkawmnah hian Larsap ngenna angin Union Aviation Minister chuan thlawhna service indaihlohna avanga Mizoram mipui harsatna chu a rang lama chinfel a lo tiam a ni.
Larsap leh Union Civil Aviation Minister te inkawmnah hian Ministry of Civil Aviation Secretary Pu Ashwini Kumar Lohani leh Joint Secretary Pi Usha Padhee te pawh an tel a. Pu Ashwini Kumar chuan Thlawhna Service indaih lohna avanga Mizoram harsatna chu sorkarin a hriat thu a sawi a, tun dinhmunah, Indigo chuan Agartala leh Aizawl inkar thlawk \hin turin ruahmanna an peihfel thawkhat tawh tih a sawi.
