Eptu party te chuan Union Budget pharh tak chu hawi lam nei lo nia sawiin a lungawi thlak loh a ni an ti. Congress party hruaitu hlun Ashok Chavan chuan budget chu hmasawnna tur thil thar awm lo nia sawiin, loneitute leh mi naran te tan hmalakna tur mumal tak tarlan a awm lo a ni a ti a. Budget thupui pakhat, mipuiten awlsam zawka nun an hman theihna tur tih chu inthlanna thlir rana ruahman mai a ni a ti. CPI(M) General secretary Sitaram Yechury chuan budget chu a tak taka thil awmdan nena inzawmna nei lo niin a sawi a. Duhthusam \henkhat ziah lanna mai nia sawiin, loneitute sum lak luh tipung tura sorkar intiamna pawh vawiin thlenga tih puitlin a la ni lo a ni a ti. Trinamool Congress hruaitu Dinesh Trivedi chuan Budget chuan thil thar engmah a fun lo nia sawiin, kum 2022 atana BJP manifesto mai a ni a ti a. Finance Minister chuan kum 2022-a a duhthusam thil te chauh a sawi chhuak a, railway lam tan phei chuan thil thar a awm lo a ni a ti.
Biju Janata Dal hruaitu Bhartruhari Mahtab chuan \halaite leh loneitute hmasawnna tura ruahmanna siam anih laiin, hemi atana sum dah zat a chiang si lo a ni a ti a. Rashtriya Janata Dal hruaitu Jai Prakash Narayan Yadav chuan Budget chu thil lawmawm loh tak nia sawiin, mipui nawlpui tana hnemhnana tur engmah a awm lo a ni a ti.
