US Florida Parkland School-ah inkahna thleng, mi 17 thi

US Florida Parkland school pakhatah kum 19 mi rawlthar pakhatin silai a pawng kah chiam avangin mi 17 aia tlem lo an thi. Silai hmetpuaktu hi he school-a lo kal tawh hnawh chhuah tak, Nikolas Cruz a ni a, Police ten an luh chhuah vel lai hian zirlai dangte chu biru tura hrilh an ni a, tun tum hi kum 2012-a Connecticut school Sandy Hook-a mi 26 kah hlum an ni hnua school beihna thleng nawn leh rapthlak ber a ni. Braward County Sheriff Scott Israel sawi danin Cruz hian school pawn lamah mi 3 a kahhlum hnuah school hi luh chilh zuiin midang 12 a kaphlum leh a. Zirlai pahnih chu damdawiin thlenpui an nih hnua thi an ni. Hliam zinga pathumte chu an dinhmun a tha lo hle a, midang pathumte erawh thih hlauhawm an ni lo thung. Vanduaina tawk ta te hming leh an nihna kimchang hi puanzar a la ni lo a, mitthi zingah hian football coach pawh a tel a ni. Police leh Swat team te chu misual chetna hmun, Soneman Douglas High School ah hian thlengin zirlaite chhanchhuah hna hi an thawk nghal a, pawikhawihtu Cruz-a hi a bulhnai khaw pakhat Coral Springs ah Police te chuan an man nghal a ni. Cruz hian pawi a khawih hma pawh hian social media lamah ralthuam chi hrang hrang pholang nasa thin hle a, silai leh a mu te bakah chemte lu zum chi hrang hrang te pawh social media lamah a pholang fo tawh thin a ni. A milem post tam takah hmaituam chunga silai leh chemte kenglai te a tam hle.