US President Donald Trump-a’n National Rifle Association vengthawng lo turin dan siamtute hrilh

0
659
views

US President Donald Trump chuan dan siamtute chu silai neitu pawl inzawmkhawm thil thi thei tak, National Rifle Association te vengthawng lutuk lo turin a hrilh. A awmna party ngaihdan pel deuha thu sawiin, President hian dan siamtute chu silai khuahkhirhna dan tha zawk ngaihtuah chhuak turin a hrilh a, Silai lei turte dinhmun chiang zawka enfiahna tur te, silai lei thei chin kum bithliah kum 18 atanga kum 21-a tihsan dan turte ngaihtuah tul a tih thu a sawi. Zirna In-a mi 17 zet kahhlum an nih hnua meeting a kohah Trump-a hian a ngaihdan hi a sawi chhuak a, hei hian dan siamtute zinga mi ngeite pawh a barakhaih hle tih The New York Times chuan a tarlang a, CNN chuan Republican te pawh an ngaihdan a inang lo niin a sawi bawk. Republican hian mimal tinin silai an neih theihna dan hi a thlawp a, chumi khuahkhirh tumna chu US Constitution siamthat vawi 2-na kalh niah an ngai a ni. President hian miin silai a lei dawna a nihna uluk zawka zirchian hmasak te, mi hlauhawm ni thei awma ngaihte chu Police ten court thupek tel kher lo pawha an silai an chhuhsak theihna tur dan siam te, silai lei thei chin kum bithliah kum 18 atanga 21-a tihsan te leh zirtirtu silai kawl tirte a rawt a ni.