US President Donald Trump leh North Korea Supreme Leader, Kim Jong Un-te inhmu dawn

0
384
views

US-a cham mek, South Korea sorkar aiawh, Chung Eui-Young chuan vawiin khan White House kawtah chanchinbumite a kawm a, North Korea a tlawh chungchang kimchang taka President Trump-a a hrilh tawh thu leh thla thar lamah Kim Jong-Un leh Trump-te hmaichhana an inbiak theih a beisei thu a sawi. Eui-Young chuan nuclear ralthuam siam tawpsan turin Kim Jong Un hian a inpeih thu a loh hrilh bakah, missile enchhin tawh loh te pawh a remti niin a sawi a, South Korea leh US sipaite’n indo nunchan an zir \hin pawh chhunzawm zel a remtih thu te, President Trump-a a hmuh chak tawh thu-te a lo hrilh niin a sawi bawk a, hetiang dinhmun an thleng thei chu a lawm thu leh, President Trump leh a kaihhruai sorkar-in na taka North Korea an nawr vanga hmasawnna hmu thei an nih thu te a sawi bawk a ni.

Kim Jong-Un-a sawmna hi President Trump chuan a pawm tih White House chuan vawiin khan a sawi ve nghal a, South Korea President Moon Jae-In leh an ram palai-te thuchah ken chu lawmawm an tih thu leh, ram hruaitu lu pahnih-te an inhmuh theih hun tur an ruahman nghal dawn tih an sawi bawk a ni.

President Donald Trump leh Supreme Leader Kim Jong-Un te inhmu tur hian ngaihven a hlawh hle a, US President ni lai leh North Korea hruaitute hi hmaichhana an la inhmuh ngai loh bakah, phone pawhin an la inbe ngai lo a ni. US President hlui zingah, Jimmy Carter leh Bill Clinton-te kha President an nih tawh loh hnuah, North Korea an tlawh ve ve tih loh chu tlawhtu dang an la awm ngai lo a ni.