Home Minister, Amit Shah hian Congress hruaituten an thil phut an auchhuahpui veleh house a chhuahsan a ni. Congress hruaitute hian Sonia Gandhi leh a fate pahnih, Rahul Gandhi leh Priyanka Gandhi Vadra te chu dinhmun hlauhawma ding reng an nih thu leh SPG venhimna hlih sak an ni chu an hriatthiam loh thu leh Union Home Minister Amit shah chu hemi chungchang sawifiah tura an phut thu an sawi a, an thil phut an auchhuah pui veleh hian Amit Shah chuan house a chhuahsan a ni.
Kum 1991-a Rajiv Gandhi thah a nih a\ang khan Gandhi chhungkua hi SPG venhimna pek an ni \hin a, mahse tun thla ni 8 khan Z Plus Category venhimna-ah sawn an ni a, Z Plus Category venhimna hnuaiah hian mi pakhat veng turin CRPF mi 100 vel zel ruat an ni \hin a ni a, tun dinhmunah chuan SPG venhimna hi PM Narendra Modi chauh pek a ni a, BJP kaihhruai sorkar hian kumin August thla khan PM hlui Manmohan Singh pawh SPG venhimna hi a lo hlih sak tawh a ni. SPG-ah hian sipai \ha leh thlan bik 3000 an awm a ni.
House-a zawhna leh chhanna hun hman laiin Congress leh National Conference hruaitu mi 20 vel te chuan an \huthmun chhuahsanin an thil phut hi an auchhuahpui a, Speaker Om Birla chuan an \huthmun \heuha let turin a ngen a, amaherawhchu, an thil phut an chhan hma chu lungawi lohna an lantir chhunzawm a ni. Speaker chuan house-a ngaihtuah tura chhawpchhuah chu loneitute chungchang a nih tih sawiin, hetiang thil pawimawh ngaihtuah tur a awm laia a tibuai zawnga an khawsa chu \ha lo a tih thu a sawi a ni.
