Vawiina Assembly Budget Session \hutkhawmah kumin January ni 19-a thi MLA hlui, Pu F. Manghnuna sun a ni.

0
294
views

A sunna thusawitu House Leader, Pu Zoramthanga chuan, Pu F. Manghnuna sun a lo ngai ta mai chu pawi a tih thu leh a mimal tak pawha a ui thu a sawi a ni. Pu F. Manghnuna chu mi taima leh tumruh tak a ni tih sawiin, ram rawngbawlnaah pawh a thawh hlawk hle a, mi chhunawm, viak \ha leh kawng tin renga chhawr tlak a ni a, chhim lam mipui tan phei chuan pa chhuanawm tak a ni tih sawiin, a thihna chu Mizoram leh hnam tan channa nasa tak a ni tih Pu Zoramthanga chuan a sawi a ni.

Lawngtlai East bialtu MLA, Pu H. Biakzauva pawhin Pu F. Manghnuna chu mi ropui tak a ni tih sawiin, Lai Autonomous District Council-a Chief Execuitve Member lo ni tawh a nih thu a sawi a, ADC sorkar bakah MLA \um 1 a nih chhung pawhin entawn tur tam a hnutchhiah tih a sawi a, Lai hnam ziakmi \henkhatin Lairam Arsa lian ti hialin an ko a ni a ti.

Palak bialtu MLA, Pu KT Rokhaw pawhin, Pu F. Manghnuna chu pa nelawm, thusawi thiam leh tumruh a ni tih a sawi a, ZPM Group Leader, Pu Lalduhoma pawhin, Pu F. Manghnuna chu mimal taka a hriat chian leh ngainat a ni tih sawiin, a ui hle tih a sawi.

Pu F. Manghnuna hi kum 1938 July ni 7 khan Saikah khuaah a lo piang a. Kum 1969 September ni 6-ah Sorkar hna bansanin Politics a luhchilh a. Lai Autonomous District Council-ah \um 5 MDC atana thlan tlin a ni a. Hetih chhung hian Chief Executive member \um 4 leh Chairman hna \um 1 a chelh a. Kum 1987 khan Congress Ticket-in Lawngtlai bialah MLA atan thlan tlin a ni a. Hemi \um hian MIFCO Chairman atan ruat niin, a thihni thlengin Lai District Congress Committee-ah Vice President hna a chelh a ni.

Kum 2017 April thla vel atang khan a pum lam a sawisel \an a, Cancer natna a vei tih hriat a nih hnuah enkawl zui a ni a a, kumin January ni 11 khan Lawngtlaiah a thi a ni. Vawiina a mah sunnaah hian member-te chu ngawi rengin Minute khat chhung an ding a ni.