West Phailenga KTP General Conference vawiina Pandal-a chhunzawmah chawhma lamah General Secretary-in hmalakna hrang hrangte a tlangpuiin a tarlang a, bial report khaikhawm leh finance report pawh ngaihthlak a ni bawk. Rawngbawlna report-a tarlan danin bial hminga Missionary chawm zat chu 384 a ni a, Branch-in a chawm zat chu 2705 a ni a, a pumpuia belhkhawm chu 3089 a ni. Mizoram chhunga Branch hrang hrang 815-ah leh Mizoram pawna Branch hrang hrang 45 awmah KTP member 1,47,665 an awm tih tarlan a ni a, nupui pasal nei chhiarnaah chuan nikum 2017 chhung khan KTP member innei 3,542 an awm a, an zinga 1,484 chu Biak In hawnga innei an ni a, hmundanga innei 2,058 an awm bawk a ni. Kum 2016 khan innei zawng zawng chu 3,594 an ni a, Biak Ina innei pawh hemi kum hian 1,517 an tling a, nikum aia an tamna hi 33 a ni. Nikum chhung khan member thi awm lohna bial 53 a awm a, hemi chhunga member thi zawng zawng belhkhawm chu 115 an tling a, thi tamna ber chu Luangmual Bialah a ni a, 19 an tling a ni. Bial hrang hranga member tamna ber bial chu Ramhlun North a ni a, member 2,287 an awm a, member tlemna ber Buarpui bialah chuan 46 an awm a ni. Chawhnu lamah Central KTP Committee Member, Pu F. Vanlalruata kaihhruaiin Variety Programme neih a ni bawk. KTP General Conference hi Zonet chuan Bawhbel channel ah Live in a pe chhuak a ni.
