YMA Kumpuan, ‘Ram leh Hnam humhalh’ tih bawhzuiin Lunglei Sub Hqrs. YMA hruaituten Tlabung leh a chhehvela ram dang mi lo lut rute man chhuah dan tur Tlabunga YMA hruaitute an sawipui

0
331
views

Lunglei Sub Hqrs. YMA hruaituten YMA Kumpuan, ‘Ram leh Hnam humhalh’ tih bawhzuiin Tlabung leh a chhehvela ram dang mi lo lut rute man chhuah dan tur leh Electoral Roll-a thun an nih loh dan tur chungchang, Tlabunga YMA hruaitute an sawipui a, Birth Certificate lem siam a nih lohna tur te, ram dang mite Aadhaar Card siamsak an nih lohna tur te-in a huhova tan lak a tul thu an sawi bawk a, Mizoram thing leh mau, Bangladesh tawlh luh a nih lohna tura hnathawh dan tur pawh an sawi bawk. Lunglei Sub Hqrs. YMA hruaitute hian Zirtawpni khan a huhovin Tlabung an tlawh a, YMA Runah Tlabung khaw chhunga YMA Branch hrang hrang hruaitute kawmin, ram leh hnam humhalhna tura hma thar lak dan tur an sawihova, Sub Hqrs. YMA hruaitute chuan chak taka tan la tura pawimawh ber chu Tlabunga YMA hruaitute an ni tih sawiin, thahnemngai taka hnathawk turin an ngen a ni. Tlabung khaw tlawhtu Sub Hqrs. YMA hruaitute hi an President, Pu R. Lalnunthara’n a kaihruai a ni. Lunglei Sub Hqrs. YMA hruaitute hian tun hnaia Khawthlang Tuipui lian tuartute chhanchhuah kawnga hnathawktu YMA senso phuhruk nan Tlabung YMA hruaitute hnenah hian tanpuina sum an pe bawk a ni.