Zemabawk-ah chenna in pahnih kang ral

0
414
views

Zemabawk Bethel venga Pu Karan Gurung-te in pahnih Assam Type ve ve chu nizan thim hlim khan bungraw engmah chhuh hman lohvin a kang ral vek. Zemabawk khawtlang hruaitute hnen atanga Zonet thudawn danin, heng in-te hi an kawmthlanga an Ar vulhna hmun atanga kang tan nia hriat a ni a, kangmei chhuak hi hriat a nih veleh thelh tumin mi tlawmngaite an pungkhawm a, Fire Department pawh rang takin thleng nghal mah se, Gas bur a puah vang leh a lo nasat hman tawh avangin thelh theih a ni lo a, in dang kang kai tur erawh an veng thei a ni. In kangah hian bungrua eng emaw zat bakah pawisa fai Rs 3,60,000/- Rangkachak cheng nuai 3 man hu vel leh LSC 7 a kangral vek a. Ar note 500 vel a kang hlum bawk. Vanduaina thlenna hmun hi nizan khan Bialtu MLA Pu R. Lalrinawma leh Additional DC Pu John LT Sanga ten an tlawh nghal a, hnatlang thingpui lumna tur cheng 2,000 ve ve an pek bakah bialtu MLA hian vanduaina tawk chhungkuate hnenah cheng 2,000 leh Silpouline a pe a, in chung tur rangva a pek dawn bakah sorkar atanga tanpuina awm thei ang ang ngaihtuah sak a tum thu a hrilh bawk a ni. In kang bang hi vawiin khan Zemabawk Branch YMA kaihhruai in khawtlangin an seng hawi a ni.