ZNP President Pu Lalduhoma’n, sorkarin sum harsatna namen lo a tawh laia, GP Fund withdraw phalsak theitu bik siam a, Quota te neia sum siam nana hmangah sorkar puhin, titawp nghal turin a phut

0
723
views

ZNP President Pu Lalduhoma’n, sorkarin sum harsatna namen lo a tawh laia, GP Fund withdraw phalsak theitu bik siam a, Quota te neia sum siam nana hmangah sorkar puhin, titawp nghal turin a phut. He thu hi vawiina ZNP chhung inkhawm, an party pisa-a neihah sawiin ZNP President chuan, Dearness Allowance chu sorkar hnathawkte tan Central sorkarin January ni 1, 2006 atangin kum khatah vawi 2 zel, January ni 1 leh July ni 1 a pek turin a ti a. Mizoram sorkar chuan January ni 1, 2009 atang chauhin a pe tan thei a ni, a ti a. Chutiang bawkin Dearness Relief pawh Pensioner-te hnenah January ni 1, 2006 atangin kum khatah vawi hnih, January ni 1 leh July ni 1-ah pek tur a ni a, Mizoram sorkar chuan July ni 1, 2008 atang chauhin a pe tan a ni, a ti bawk. ZNP President chuan, DA pung chu tihluihnain sorkarin an GPF ah sorkar hnathawkte a dah sak niin a sawi a. Central-in DA leh DR te hi a pekchhuah hnuah pawh Mizoram sorkar chuan pe mai lovin, rei tak tak a hrensak thin niin a sawi a, Pensioner-te DR phei chu sorkar hnathawk DA an dawn rualin an dawng ve ngai lo va, an hrensak rei bik thin a ni a ti. DA leh DR-te chu a hun taka pe thin tur leh, Pensioner-te DR pawh DA ruala pe ve nghal mai tur te, DA pung GPF-a tihluihnaa dahsak te ti tawh lo turin sorkar a ngen tih a sawi. ZNP President chuan sorkar hnathawkten thlatin an hlawh atanga GPF-a an dah thin chu, anmahni ta liau liau a ni a, lak chhuah an duh hunah Head of Office/DAO te phalnain an lachhuak thin tur a nih laiin, Mizoram sorkar chuan a pe chhuak thei tur bik insiamin, an pek chhuah theih zat tur Quota te an insiam niin a sawi a, hei vang hain GPF withdraw duhte chuan Quota nei hote hi tlawnin, engemawzat an pe ve thin tih sawi a awm a, Hei hi dan kalh anih bakah eirukna rapthlak tak a nih avangin ti tawp turin sorkar an phut tih a sawi. ZNP chhung inkhawm hi Chief Organiser Pu Lalthanchhunga Ralte in a kaihruai a ni.