Tangrual pawl Zoram Peoples Movement in thuneihna a chan chuan thlai thar leina tur Budget ah dah a ni dawn nia sawiin, ZNP President Pu Lalduhoma’n tun atanga Sawhthing leh Hmunphiah chiang uar turin kuthnathawktute a chah.
Vawiina Aizawl Treasury Square-a an Party chhung inkhawmah he thu hi sawiin, Sawhthing chu a hralhna a that loh avangin Mizoram hmun hrang hranga a chingtuten an cho ngam rih lo niin a sawi a, Sorkar Flagship Programme, NLUP-a trade lian ber Hmunphiah pawh sorkar-in a hralhna a ngaihthah hle niin a sawi bawk. Pu Lalduhoma chuan, Congress kaihhruai Mizoram Sorkar in pul leh mai tur, Burma Vawkte leina tur Budget-ah an dah thei a nih chuan kuthnathawktute thawhrah leina tur Budget-ah a dah theih tih a chiang niin a sawi a, kuthnathawktute chu tun atanga Sawhthing leh Hmunphiah ching uar turin a chah a ni. Mizoram hmun hrang hranga an fehchhuahnaah ZPM chu mipuiin a bawh chho mek niin ZNP President hian a sawi bawk a, hun leh sum tam tak senga ZNP-in kum engemawzat hma a lo la tawh chunga ram siam tha tura an Party mipuite’n Party rilru dahtha a, tangrual pawl, ZPM din an duhna chu Pathian remruat nia a ngaih thu a sawi bawk. ZNP chhung inkhawm hi General Secretary, R. Lalthuama’n a kaihruai a ni.
