ZPM MLA, Pu Vanlalhlana’n MNF leh Congress Party chu ze inang, hming chauh inang lo niin a sawi.

0
238
views

He thu hi vawiina an pawl chhung inkhawmah sawiin, Pu Vanlalhlana chuan, Congress party khan NLUP tawktarhin sorkar an siam a, hetiang chiah hian MNF pawhin SEDP tawktarhin sorkar an siam ve leh a, hei hi a thlawna sum sem policy ve ve a ni a, danglamna pakhat mah a awm lova, an danglamna chu an hming chauh a ni, a ti. MPCC President, Pu Lal Thanhawla leh MNF President, Pu Zoramthanga chu ahni party dinchhan leh thiltum phatsan ve ve-ah puhin, Pu Vanlalhlana chuan, Pu Lal Thanhawla chu vai pawl hruaitu ni chung renga Zo hnahthlak inzawmkhawmna leh Mizo Nationalism leh Independent sawi ve zeuh zeuh \hin a ni, a ti a. Pu Zoramthanga erawh chu Mizo Nationalism neitu a inchhal siin, India Nationalism a intulut thuk tlat a ni thung nia sawiin, Mizo Nationalism chawisan tum ni si a, Naga helpawl leh hmarchhak biala helpawl dangte India-a lut tura thlemtu a ni tih sawiin, Parliament-a Citizenship (Amendment) Bill, 2016 pass a nih loh nana NDA leh NEDA zawmna chhu chat tura mipuiin an beisei viau chung pawha engmah ti ngam lovah Chief Minister, Pu Zoramthanga chu a puh a ni.

Pu Vanlalhlana chuan, MNF kaihhruai sorkar-in zu khap a tum dan leh Dry Day a puan dan chu a fuh tawk lo niin a sawi a. Zu hi khap an duh tak tak a nih chuan Ordinance hmangin Governor-in Order a chhuah ang a, chumi chu thlaruk chhungin Assembly House-in a pass tur a ni a, chumi a nih loh pawhin Special Assembly duh duh huna koh theih a nih laia khawvela Dry Day rei ber an puang ringawt hi a fuh lova, zu khap dan mumal lova zu khap tum hi a dik lo a ni, a ti bawk.

He inkhawm hi ZPM General Secretary, Pu Liankhuma Hrahsel-in kaihhruaiin, Aizawl South II bialtu MLA, Pu Lalchhuanthanga pawhin thu a sawi a ni.