Afghanistan-a thih chilh bomb puakah civil mi 5 thi

0
347
views

Afghanistan chhim lama Helmand province-a thih chilh bomb puakah civil mi 5 an thi a, mi dang 25 vel an hliam. Helmand Governor thupuangtu sawi danin, vawiin khan police pisapui bula motor dinnaah Taliban mi firfiak pakhatin bomb hmanga hnawh khah motor a tipuak a, hliam zingah hian hmeichhia leh naupang engemaw zat an tel a, bomb hian a bul hnaia Muslim zirna in pakhat a tichhe tel bawk a ni. Hei hi Thawhtanni zana US President, Donald Trump-a’n Afghanistan rama indona a la tawp mai dawn loh avanga sipai tirh belh a tum nia sawi hnua Taliban mi firfiakte’n pawi an khawih leh vawi khatna a ni a, puan tawh angin, President Trump-a hian US sipaite’n Afghanistan ram an chhuahsan chuan, a nghawng a na hle dawn nia sawiin, America sipaite hmun ruak chu mi firfiakten an hnawh khah nghal dawn avangin, hei hi pawm chi a ni lo tih a sawi a, hemi hnu hian Taliban thupuangtu, Zabiullah Mujahid chuan Trump-a hi chhang letin, US-in Afghanistan atanga a sipaite a lak chhuah thuai loh chuan Afghanistan ram chu America sipaite thlanmualah a chang leh thei tih a sawi a, Mujahid-a hian indo zel ai chuan, US hian Afghanistan ram chhuahsan dan ngaihtuah se a fuh zawk dawn nia sawiin, Afghanistan ramah US sipaite an awm zui zel a, Taliban mite an beih zel chuan, an lakah indona thianghlim an chhunzawm zel dawn niin a sawi bawk. US sipaite leh Afghanistan mi firfiakte hi kum 16 chhung zet an inbei tawh a, hetih chhung hian civil mi sang eng emaw zat an thi tawh a, kumin January thla atanga May thla inkar chhung khan Afghanistan police 2,500 chuang an thi nia hriat a ni bawk.