Kum 1987 khan US President Ronald Reagan leh Soviet Leader, Mikhail Gorbachev te chuan Intermediate Range Nuclear Force-a inremna thuthlung an ziak a, an inremnaah hian missile km 500 leh 5,500-a thui kah an khap a ni.
Kumin kumtir lam khan US leh Nato chuan Russia hi inremna bawhchhia-a lawnga hman tur missile thar siamah an puh a, hei hi Moscow sorkar chuan a pha thung. US hian Russia-in 9M729 missile a siam tih finfiahna a nei tih a sawi a, he missile hi SSC-8 tia sawi a ni bawk.
Inremna zuihral chhanah Russia chu a mawhphurtu awmchhun a ni tih US Secretary of state Mike Pompeo chuan a sawi.
President, Donald Trump chuan February thla khan Russia nen an inremsiamna a\anga inhnuhdawh a tum thu hi a lo sawi tawh a, Russia-in thu leh hla an neih loh chuan August 2 chu hun tawp ni turah a lo ruat tawh a ni.
Hetihlai hian Russia President, Vladimir Putin chuan Cold War hunlaia INF-a US nen an inremsiamna chu a titawp lailawk tih a puang ve bawk.
Putin chuan missile ralthuama inremna a\anga US a inhnuhdawh avangin anni pawh an inhnukdawk ve nghal tih a sawi a, missile thar duan chhuah leh a tum tih a sawi bawk.
