Vawiin hi Lok Sabha inthlan thawh 2-na atana campaign hun tâwp ni a ni a, party hrang hrangte an campaign ngawrh hle.

0
102
views

BJP candidate te tan Chhattisgarh leh Odisha-ah PM Narendra Modi a campaign a, Odisha-a Sambalpur leh Chhattisgarh-ah te vantlang inkhawm a buatsaih a, Odisha khawpui Bhubaneshwar-ah campaign kharna hun a hmanpui bawk a, ramchhung hmun hrang hranga tui lama harsatna su kiang turin “jal shakti” ministry din an tum thu a sawi a ni.

Congress President Rahul Gandhi pawhin Kerala a tlawh a, vantlang inkhawma thu a sawinaah India chu mimal thil thlir dan leh mimal suangtuahna chauh ni loin mi maktaduai chuang thil thlir dan inang lo tak tak inchhunfin a ni tih puanzar a duh avangin Wayanad biala ding a ni tih a sawi a, Kollam leh Alapuzha-ah te vantlang inkhawm a huaihawt bawk a ni. Nimin lama Gujarat-a thu a sawinaah Rahul Gandhi chuan NYAY scheme hnuaia sum mamawhte chu tuna mi bum leh pawisa tihchingpen chungchanga India sorkarin man tura a tih Vijay Mallya, Nirav Modi leh Mehul Choksi te ang sumdawng tlan chhiate te a\anga a hmuh tur thu leh he scheme hnuaiah hian ram chhung chhungkaw rethei zual zaa 20 te hnenah thla tin cheng 6,000 pek a ni dawn niin a sawi bawk a ni.

Home Minister Rajnath Singh pawh Uttar Pradesh khawpui Lucknow biala ding turin a hming a pe lut a, he bialah hian candidate hming thehluh hun ni 2 chauh a awm tawh a, eptu pawl te chuan candidate hming an la thehlut ve rih lo a ni.