America sorkarin Pakistan chu Haqqani Network zalenna ram a ni tih a finfiah theih chuan he pawl bei tur hian America thawhpui hreh lo- Pakistan Foreign Minister

Pakistan Foreign Minister, Khawaja Asif chuan, America sorkarin Pakistan ram chu mi firfiak pawl, Haqqani Network zalenna ram a ni tih a finfiah theih phawt chuan, he pawl nuai bo tura America thawhpui a inpeih thu a sawi a, August thla khan US President, Donald Trump-a chuan Pakistan ram chu mi firfiakte hum ching leh an zalenna ram nia sawiin, America sipaiten kum 17 chhung, Afghanistan rama an beihte chu Pakistan ramah hian an zalen viau zel niin a sawi a ni. Asif-a hian tun hnaiah Washington a tlawh a, Express News hnenah, an duh phawt chuan America sorkar hotute hian Haqqani network dinhmun hi en fiah tur hian Pakistan ram an tlawh thei reng a, President Trump-a sawi hi a dik tih an finfiah theih chuan, Pakistan sorkar chu he pawl nuai chimit tura America sorkar thawhpui turin a inpeih reng niin a sawi a ni. Haqqani network pawl hian Afghanistan ramah US mite ru bovin, pawi a khawih fo tawh a, kum 2008-a Kabul-a Indian embassy bei a, mi 58 thihna thlentu pawh kha he pawl hi nia ngaih a ni. Pakistan sipai lal, General Qamar Javed Bajwa pawhin he thu bawk hi tun thla tirah khan Afghanistan President, Ashraf Ghani a lo hrilh tawh tih Pakistan Foreign Minister chuan a sawi bawk.