MIZO TV SERIES THAR “ROSE” JULY-AH

0
154
views

Leitlang Pictures siam Mizo TV series Rose chu July ni 7, 2020-ah premiere a ni dawn ta. Rose hi Zonet Original Series niin Zonet TV channel bakah an digital platform a en theih tura ruahman a ni a, episode 8 ah ṭhen a ni a, kar khatah episode pahnih chhuah ṭhin a ni ang.

He Mizo TV series Rose hi hotel room-a ruang chhar chhungchang police in case a tihtawp hnua chanchinbu mi pakhatin a chhui chhoh dan a ni. A thu hi Dr. Zarzosanga, Serchhip ziah a ni a, fiction niin suspense thriller film a ni dawn. Director Mapuia Chongthu chuan “Script pathum lai ka hnawl hnuah he script hi ka hmu a, suspense script angah chuan a la tha ber pawl niin ka hria. Film making lamah pawh chona lian tak min pe a, theihtawp ka chhuahin ka hria a; a thu pawh kan phawkchhuak nalh viauin hriatna ka nei. Kan film siam tawhah chuan ka chhuan ber pawl a ni” a ti.

Zonet Director LV Lalthantluanga chuan “Leitlang Pictures nen kan thawkho thei hi ka lawm takzet a, an hnuhma/kutchhuak enin ‘Rose’ pawh hi a hmuhnawm leh ngei a rinawm. Covid-19 avanga inkharkhip karah he TV series hian min awi se, mahni in lamah hmuhnawm ti taka Zonet chhungkuate’n in lo en ṭheuh ka beisei” tiin series thar an tichhuak tur chu phurawm a tih thu a sawi bawk.