Mizoram BJP Vigilance Cell-in PWD Aizawl Road South Division hnuaia hnathawh thenkhatah thil dik tawk lo awm nia hriain a chhui chiang tur leh, thil tisualtu chu dan anga hrem a nih theih nan ACB-ah vawiin khan FIR an thehlut a, ACB SP, Pu John Zothansanga’n a lo dawng a ni. Hemi hnua thuchhuah an siamah BJP chuan, RTI hmanga an zawhna, PWD Aizawl Road South Division-in a chhanna-ah, kum 2015-16 chhunga Retaining Wall, hmun 25 a siam anga an sawi leh an sum hman chu a inmil lo hle niin an sawi a, Lungremna nia an sawi chu a hmuna kala an enfiah vek hnuah an sawi anga hnathawh hmuh tur a awm mumal lo tih an hmu chhuak niin an sawi a, heta sum sen zawng zawng chu Rs.67,75,000 niin an sawi. BJP chuan, sum tam tak sen ralna, a tak hmuh tur awm lo a awm thin chu PWD enkawltu CM leh a puitu, a nau mawh liau liau nia sawiin, Mizoram thanmawh bawk an ni, an ti a, Congress chu mipuite hmasawnna aia party mi leh chhungkhat induhsakna tihluartu, hnathawh that aia lal ngawr ngawr kheltu nia sawiin, Mizoram mipui tana retheihna thlentu chauh niin an sawi bawk.
