PM hlui thi ta, Atal Bihari Vajpayee chu vawiin khan ropui takin Delhi-ah vui liam a ni a, Smriti Sthal-ah tlai dar 4 khan a ruang hal ral a ni a, ni 7 chhung sûn a ni ang.

0
365
views

Puan tawh angin Vajpayee hi chawlhkar 9 vel AIIMS damdawiina enkawl a nih hnuah nimin tlai dar 5:05 khan kum 93 mi niin a thi a, a ruang hi a chenna Krishna Menon Marg-a dah a nih hnuah BJP pisa pui-ah dah a ni leh a, amah suntu leh thlahtu an \hahnem hle a, a’n ui thu sawitute zing ami, PM Narendra Modi chuan Vajpayee chu politics khawvela a mi ngaihsan ber te zing ami a nih thu leh a thi chu ama pa sun ang maia a inngaih thu leh mimal taka a tawrh thu a sawi a ni. Vice President Venkaiah Naidu, Union Home Minister, Rajnath Singh, BJP President Amit Shah, mi pawimawh dang \hahnem takin Vajpayee ruang hi an hmu bawk a, a thih hma deuh lawk khan rorel lai NDA \angrual pawla mi pawimawh te leh eptu lam party mi \hahnem takin an tlawh bawk a ni.

PM ni lai emaw President ni lai emaw an thih chauha chawlh puan \hin a nih vangin Union Home Ministry chuan Vajpayee thih thu a puan hian chawlh a puang tel lo a, mahse a hnuah Union Cabinet chuan kalphung pangngai kalsanin PM hlui sun nan hian Delhi-a sorkar pisa zawng zawng chawhnu lamah a khar tur leh chawlh puang chhunzawm turin a ti ta a ni. State hrang hrang sorkar pawhin Vajpayee sun nan hian chawlh an puang ve bawk a, Mizoram bakah Punjab, Uttarakhand, Bihar, Madhya Pradesh, Delhi, Tamil Nadu, Puducherry, Meghalaya, Jharkhand, Himachal Pradesh, Haryana, leh Odisha-te chuan PM hlui an zahna lantirna atan zirtawpni hi chawlh-ah an puang a, zirna in zawng zawng leh sorkar pisa zawng zawng an khar a ni.