Karnataka Sorkar buaina kal chho zelah Congress leh Janata Dal \angdun sorkar chu MLA 14 in an chhuahsan ta a, MLA te banna hi pawm a nih chuan sorkar dinglai a tlu dawn tihna a ni.

0
11
views

Speaker Ramesh Kumar chuan MLA te banna lehkha te hi a enfiah a, a thutlukna siam danin \angrual sorkar dinhmun tur a hril dawn a ni. Congress MLA Roshan Baig chu a bang ve leh a, Congress hi MLA dang pawhin an chhuahsan belh lovang tih a sawi theih lo a, tel vek tura hriattirna khauh tak nena meeting an kohah pawh MLA 12 chu an tel ve lo a, pathum chuan dam lohna an chhuanlam a ni. Meeting-a tel MLA pakhat Sowmya Reddy-i chuan banna a thehlut ve dawn em tih a la chian bik loh thu a sawi bawk a, Sowmya Reddy-i pa Ramalinga Reddi chuan Inrinni khan banna a lo thehlut tawh a ni.

Congress hruaitu Siddaramaiah chuan an party laka hel MLA te chu vaukhanin, Speaker hnenah heng MLA te hi MLA an nihna a\anga bantir tur leh kum 6 lo awm leh tur chhunga inthlanna chuh thei lo tura hrem turin an ngen tih a sawi a, banna an thehluh chu hnuklet-a congress-a kir leh turin an sawm tih a sawi a, Speaker chu banna thehluhte pawm rih lo turin an ngen tih a sawi bawk.

Congress leh JDS MLA ten Inrinni-a banna an thehluh lai hian speaker hi a awm lo a, ram danpuiin hmalak dan tur a sawi angin hma a la dawn tih a sawi a, tun thlengin MLA tu mahin amah hmuh tuma an la pan loh thu Speaker hian sawiin, a duh piang tan hmuh theih turin a office ah a awm reng dawn tih Speaker hian a sawi bawk a ni.

MLA te banna hi pawm lo ni ta se, seat 224 awmna Karnataka Assembly house ah hian rorellai Congress leh JDS \angdunin member an neih \hin 118 chu 102 ah a tla thla dawn a, sorkar siam thei tura member neih ngai zat pawh 113 a\angin 105 ah a tla thla bawk dawn tihna a ni a, BJP chuan member 105 an neih bakah thlawptu independent member 2 nen member 107 a nei dawn tihna a ni.

Congress leh JDS \angdun sorkara Minister te chuan MLA lungawi lote tana hmun kianin banna an thehlut tawh a, MLA dangin an chhuahsan tawh lohna turin JDS chuan an MLA te hi Bengaluru daipawna resort pakhatah an khungkhawm a ni.

Chief Minister HD Kumaraswamy chuan Congress leh JDS minister te an vaia an ban thu sawiin, minister thar lakluh thuai an ni dawn tih a sawi a, sorkar chu a tlu dawn lo niin a sawi.

Party pahnih tangdun sorkar hian BJP chu sorkar dinglai namthluk tuma, an MLA te thlemah an puh a, BJP chuan inrawlhna an nei lo niin an sawi thung a ni.