Afghanistan chhim lamah Damdawiin pakhat chu Taliban ten bomb hmangin an bei a, mi 20 aia tlem lo an thi.

0
361
views

Bomb hi truck pakhata phurh a ni a, he truck hian damdawi In hi su in a bomb phurh chu a puak zui a ni. Qalat khawpui Damdawi In beihna-a thi te zingah hian doctor leh dam lo te an tel a, civil mi 20 aia tlem lo an thi a, mi tam tak an hliam a ni.

Taliban te hian beih an tum tak zawk chu a bul hnaia sorkar inteligence dept building zawk a ni tih an sawi a, kabul-a defence Ministry-a thawktu pakhat chuan hel pawlte hian National Directorate of Security building beih an tum a, a bul hnaia damdawi in pakhat bulah bomb phur truck hi an din tir tih a sawi.

Hemi hmalam hian Afghanistan khawpui Kabul-a Afghan President Ashraf Ghani campaign-na bulah bomb tih puah a lo ni tawh a, mi 48 an thi a ni.

Taliban te hian September ni 28-a inthlanpui neih tur thlirin Afghanistan sorkar laka beihpui an thlakna chu nasa leh zuala kalpui an tum tih an lo puang lawk tawh a, inthlanpui neih turah hian president Ghani chuan a term hnihna chelh tumin chuh leh a tum a ni.

Hetihlai hian Afghanistan sipaite chuan US indo thlawhna puihnain Afghanistan khaw chhak lam-ah beihpui an thlak a, hetah hian mi 30 an thi a, midang 40 an hliam a ni. He beihpui thlakna hi Islamic State of Iraq and the Levant, ISIL, ISIS mi leh sa te tawmkuk tih chhiat tumna a ni a, Wazir Tangki biala loneitute chenna hmun an bei palh ta zawk a ni. Helai biala provincial council member Sohrab Qaderi chuan drone hmanga beihnaah hian civil mi 30 an thih bakah 40 an hliam tih a sawi. Afganistan Defence Ministry chuan he inbeihna hi a nemnghet a, mitthi leh hliam zat erawh a puangzar lo thung.