Afghanistan rama US indo thlawhna ten civil mi 10 tihlum

0
500
views

Afghanistan rama US indo thlawhna bomb thlak avangin civil mi 10 an thi. He thil thlenna hmun, Afghanistan ram khawchhak lam, Nangarhar-a chengte chuan thi zinga 5 hi naupang niin an sawi a, hliam zinga hmeichhe pakhat phei chu a ke a chhe nasa hle tih an sawi. Nangarhar awmna district thuneitute chuan indo thlawhnate hi US ta a nih ngei thu leh, civil mite bei tura chhuak ni ngeia an hriat thu an sawi a, US indo thlawhna bomb thlak avang hian chhungkaw pakhat chu an mang vek niin Haska Mina Governor, Saaz Wali Shinwarit chuan a sawi. Ruang thenkhat phei chu tu an nih pawh hriat theih loh khawpin a chhia nia hriat a ni. Afghanistan rama US Air Force hotute chuan he puhna hi thu dik lo nia sawiin, helai hmuna chengte hian tun hma pawhin civil mi an thi nia sawi an lo ching niin an sawi a, an indo thlawhnate hian civil mi leh mi firfiakte an thliar theih nan khawmual sipaiten an pui zel nia sawiin, motor an kah-ah pawh hian mi firfiak pawlte’n ralthuam an lek lai an hmu ngei niin an sawi. US Air Force thupuangtu, Bob Purtiman chuan he thil thlengah hian civil mi thi an awm thei lo niin a sawi bawk a ni.