Jagan Reddy-a patea, MP hlui, YS Vivekananda Reddy chu Kadapa-a a chenna inah thia chhar a ni a, a fanu Sunitha Narreddy chuan a pa thihnaa a chhungte zinga mi \henkhat te chet dan chu rinhlelawm a tih thu sawiin, a unaupa CM Reddy chu mawhphurtu ber a ni a ti.
Sunitha Narreddy chuan Special Investigation Team ten a pa thih dan an chhui dan a zawtfiah a, a unaupa-in thuneihna a chan hnua CBI kuta thubuai an dah loh chhan a zawt bawk.
Narreddy chuan SIT chu danin a phuar ta tlat leh Additional Director General of Police-in ho lova, Superintendent of Police-in a ho ta daih chu mak a tih thu a sawi a, tun hmalama a pa thihdan chhuinaa hmahruaitu, senior police officer, Abhishek Mohanty pawh hun rei tak chhung chawlh a la tawh tih a sawi bawk. Narreddy hian a pa thihnaah hian Jagan Reddy mai bakah an chhungkaw zinga mi \henkhatte pawh a ringhlel a ni.
Nikuma YS Vivekananda Reddy thih lai khan Jagan Reddy hi eptu pawl lamah awmin, a patea thihna chu CBI te chhui tir a phut a, khatihlaia CM Chandrababu Naidu kaihhruaina hnuaia Police te hnathawh dan chu a rin tawk loh thu a lo sawi tawh a ni.
