Hming ziahluh tlarna, list hi Registrar General of India hnena thawn a nih hmain a buaipuitute hian an enfel chho mek a, NRC state Coordinator thar Hiresh Dev Sarma chuan Assam State-a Deputy Commissiner zawng zawng te chu NRC-a an hming tarlan, khua leh tui ni lo zawng zawngte hming la chhuaka a hnena thawn turin a hriattir a ni.
NRC buaipuitu sorkar hotu lian pakhat chuan he hmalakna hi NRC tar chhuah a nih hunah khua leh tui ni lo te hming a chuan lohna tura hmalakna a ni a ti a, hetihlai hian hotu dang pakhat erawh chuan nikum August thla-a NRC tarchhuah a nih hma khan hei hi lo kalpui tawh a ni a ti thung.
Tuna endik turte hi vote nei zinga rinhlelhawm zual, Doubtful Voter tia sawi te, ramdangmi tia puan, Declared Foreigner te leh Foreigner Tribunal in an chungchang a ngaihtuah mek te an ni.
Supreme Court chuan Assam NRC hi a vil mek a, khua leh tui an nihna rinhlelhawm te chu NRC-a dahlut rih lo turin a ti a ni.
Assam NRC ah hian mi nuai 19 chuang hming a lan loh bakah dilna lut vaibelchhe 3.3 vel zet a awm bawk a, heng mi te hian ramdangmi tia puan an nih hnuah chauh, khua leh tui an ni tih finfiah tur hian foreigner tribunal ah an inlan thei dawn a, ni 120 chhung hun an nei dawn a ni.
